Allar færslur eftir Kjartan

Sláturgerð

IMG_0573

Í vikunni sem leið var unnið í sláturgerð á Höfða með aðkomu íbúa og starfsmanna. Tekin voru 150 slátur. Fólk var einbeitt við sláturgerðina og handtökin fagmannleg og augljóst að margir þeirra sem að sláturgerðinni stóðu hafa tekið slátur allan sinn búskap.

Létt var yfir fólki við sláturgerðina og augljóst að allir höfðu af þessu gaman. Fyrsta sláturmáltíðin var framreitt á föstudaginn, en slátrið er sívinsæll matur hjá íbúum og starfsfólki Höfða.

Yfirblandari í sláturgerðinni var sem endranær Svandís Stefánsdóttir.

Heimsókn frá Múlabæ og sólarstund

IMG_0554

Í ágúst kom hópur frá Múlabæ í Reykjavík í heimsókn til okkar og skoðaði aðstöðu dagdvalar á Höfða og drukku kaffi.

Í sumar var því miður ekki mikið um sólardaga en þegar sú gula kom úr felum var brugðið á leik úti í garði. Þar þandi Fanney nikkuna og fólk gerði sér glaðan dag.

Starfsmannaferð til Innsbruck

20140905_123945

Í síðustu viku komu 51 starfsmenn Höfða úr 5 daga fræðslu- og skemmtiferð til Austurríkis. Flogið var til München í Þýskalandi og gist þar fyrstu nóttina. Að morgni föstudags var brunað með rútu til Innsbruck í Austurríki og var hópurinn mættur í heimsókn á hjúkrunarheimilið Haus St. Josef am Inn kl. 10 um morguninn. Á móti okkur tók Dr. Christian Juranek framkvæmdastjóri heimilisins og kynnti okkur starfsemina, sýndi aðstöðuna og svaraði fjölmörgum fyrirspurnum. Á heimilinu eru um 150 íbúar. Heimsóknin var bæði fróðleg og gagnleg og mun eflaust nýtast vel til að þróa starf okkar á Höfða.

Á laugardeginu var frjáls tími sem nýttur var bæði til vettvangsferða um verslunargötur Innsbruck, auk þess sem góður hópur fór á tind Hafelekarspitze sem er í 2.334 metra hæð með aðstoð kláfa og hellulagðra stíga.

Á sunnudeginum var farið í rútuferð í gegnum Brennerskarðið yfir til Ítalíu og farið í skoðunarferð til Brixen höfuðstaðar Eisackdalsins.

Á mánudag var svo haldið heim á leið og lent í Keflavík síðdegis. Voru allir sammála um að ferðin hefði verið frábær í alla staði. Að undirbúningi og skipulagningu slíkra ferðar komu margir starfsmenn Höfða en yfirumsjón var í höndum Sigurbjargar Ragnarsdóttur. Farið var með Bændaferðum undir styrkri leiðsögn Ingu Ragnarsdóttur fararstjóra.

Nýr starfsmannafatnaður

IMG_0523

Nýr starfsmannafatnaður hefur verið tekin í notkun á Höfða.  Gamli starfsmannafatnaðurinn var kominn vel til ára sinna og úr sér genginn.  Almenn ánægja er með nýja fatnaðinn sem bæði er þægilegur og litríkur.

Sumarferð

IMG_0515
Hópurinn í Hernámssetrinu að Hlöðum

Hin árlega sumarferð Höfðafólks var farin í gær. 60 manns tóku þátt í ferðinni, íbúar Höfða og dagdeildarfólk ásamt nokkrum starfsmönnum.

Lagt var af stað kl. 13 og ekið um Hvalfjörðinn undir leiðsögn Arnheiðar Hjörleifsdóttur frá Bjarteyjarsandi sem fræddi hópinn um sögu Hvalfjarðar. Hernámssetrið að Hlöðum var heimsótt og skoðað ásamt því sem boðið var upp á kaffihlaðborð inn í safninu sjálfu.

Að þessu loknu var ekið sem leið lá til Akraness með viðkomu í Melahverfinu. Heim var svo komið kl. 17.30.

Írskir dagar á Höfða

IMG_0483

Í upphafi Írskra daga á Akranesi komu íbúar Höfða og dagdeildarfólk saman í Höfðasal og skemmtu sér. Boðið var upp á léttar veitingar. Svavar Knútur skemmti fólki með söng sínum og stóð fyrir fjöldasöng.

Þá var heimilið skreytt með írskum fánum, blöðrum o.fl. Írska stemmningin sem ríkir á Akranesi þessa helgi er því ekki síður á Höfða en annars staðar í bænum.

Ný stjórn Höfða

Á fundum sveitarstjórna Akraneskaupstaðar og Hvalfjarðarsveitar í gær voru eftirfarandi aðilar kosnir í stjórn Höfða til næstu fjögurra ára.

Fyrir Akraneskaupstað:

Aðalmenn:

Kristjana Helga Ólafsdóttir, formaður

Ólína Ingibjörg Gunnarsdóttir

Kristján Sveinsson

Varamenn:

Atli Harðarson

Svanberg J. Eyþórsson

Guðjón V. Guðjónsson

Fyrir Hvalfjarðarsveit:

Aðalmaður í stjórn Margrét Magnúsdóttir og til vara Daníel Ottesen.

Kvennahlaupið á Höfða

Þátttakendur í kvennahlaupi á Höfða
Þátttakendur í kvennahlaupi á Höfða

Myndasafn

Í dag var gengið í annað sinn kvennahlaup ÍSÍ frá Höfða, gengið var frá Höfða inn í Leyni og tilbaka. Þátttakendur voru um 50 og skapaðist mikil og góð stemming meðal þátttakanda.   Eftir „hlaupið“ var boðið upp á léttar veitingar í Höfðasal um leið og allir þátttakendur fengu verðlaunapening.  Veðrið lék við alla og var það samdóma álit allra að vel hafi tekist til.