Starfsemi

Starfsemi

Höfði er hjúkrunar- og dvalarheimili fyrir aldraða. Íbúar eru 74, þar af 56 í hjúkrunarrýmum og 17 í dvalarrýmum, auk þess sem á Höfða er eitt hvíldar- og skammtímarými. Þá er aðstaða fyrir 20 manns í dagvistun, auk heimilisfólks.

Hvíldarinnlagnir

Hægt er að sækja um hvíldarinnlögn með því að fylla út eyðublað á vef Embættis landlæknis og senda til Færni- og heilsumatsnefndar Vesturlands. Deildarstjóri heimahjúkrunar Hve- Akranesi sér um að skipuleggja hvíldarinnlagnir í samráði við deildarstjóra hjúkrunar á Hólmi (fyrstu hæð á Höfða).

Með hvíldarinnlögn er átt við tímabunda dvöl og útskrifast einstaklingur aftur heim til sín. Markmiðið með hvíldarinnlögn er að gera fólki kleift að búa áfram á eigin heimili og á meðan á dvöl stendur er lögð áhersla á styrkingu líkamlegra, andlegra og félagslegra þátta.

Hvíldargestur nýtur allrar almennrar þjónustu sem Höfði hefur upp á að bjóða ásamt því að taka þátt í félagsstarfi og þeim viðburðum sem í boði eru.

Hvíldargestur þarf að koma með:

  • Lyfjarúllu eða lyf og lyfjakort/lyfjablað. Vinsamlegast komið með augndropa, innúðalyf og smyrsl sem verið er að nota.
  • Sæng, kodda, rúmteppi (2stk).
  • Innifatnað, föt til skiptanna, náttföt og nærföt, inniskó (ekki töflur)
  • Útiföt og skó
  • Snyrtivörur, s.s. sjampó, tannkrem, rakvél, raksápu, krem ofl.

Aðstandendur annast þvott á persónulegum fatnaði og eru taukörfur á baðherberginu. Vinsamlegast komið með göngugrindur, hjólastóla og önnur hjálpartæki sem þið eruð vön að nota.

Athugið að reykingar eru ekki leyfðar á herbergjum.

Heimsóknargestir eru velkomnir allan daginn. Húsinu er læst frá kl.21:30 á kvöldin og er þá hægt að hringja dyrabjöllu í anddyri hjúkrunarheimilisins.

Af öryggisástæðum og af tillitssemi við starfsfólk eru dvalargestir vinsamlegast beðnir um að tilkynna starfsfólki um fjarveru af heimilinu.

Dagvistun

Heimild er fyrir 20 manns í dagvistun auk heimilisfólks. Einstaklingar geta fengið dagvistun frá einum til fimm daga í viku. Fólki er ekið heiman og heim. Upplýsingar og umsóknir um dagvistun er á Höfða, sími 433-4313 og hjá Fjölskyldusviði Akraneskaupstaðar, sími 433-1000.

Félags- og tómstundastarf

Starfsþjálfun er mánudaga til föstudaga frá kl. 08:00 til 16:00. Að öðru leyti fer fram fjölbreytt félagsstarf á Höfða, svo sem kvöldvökur, bingó, spilakvöld, kaffihúsakvöld, boccia o.s.frv. Þá koma oft góðir gestir í heimsókn og skemmta íbúum. Farið er í ferðalög á sumrin.

Læknisþjónusta

Höfði hefur gert samning við lækna Heilsugæslustöðvarinnar á Akranesi. Læknir hefur fastan viðverutíma tvisvar í viku. Aðgengi að annari sérhæfðri læknisþjónustu er veitt samkvæmt tilvísun lækna heimilisins.

Sjúkraþjálfun

Á Höfða er starfandi sjúkraþjálfari ásamt aðstoðarkonu. Markmið sjúkraþjálfunar er að þjálfa, örva og viðhalda hreyfigetu og líkamlegri færni íbúa. Þar fer fram endurhæfing vegna sjúkdóma, eftir beinbrot, aðgerðir og einnig veitt verkjameðferð. Veitt er einstaklingsmeðferð, en einnig er í boði aðstaða til almennrar líkamsþjálfunar og m.a. boðið upp á hópleikfimi. Sjúkraþjálfari útvegar hjálpartæki, vinnur að forvörnum og veitir fræðslu og ráðgjöf til starfsfólks og heimilismanna.

Iðjuþjálfun

Á Höfða starfar iðjuþjálfi. Markmið iðjuþjálfunar er að viðhalda og bæta líkamlega, félagslega og vitsmunalega færni íbúa heimilisins. Það er gert með íhlutun í formi fræðslu, ráðgjafar og þjálfunar. Iðjuþjálfinn leitast við að vinna skjólstæðingsmiðað þar sem hugsað er um samspil íbúans, iðjunnar og umhverfisins. Hann leggur áherslu á að efla virkni íbúans við iðju sem vekur áhuga og veitir gleði og lífsfyllingu.

Eldhús

Á Höfða er allur matur matreiddur í eldhúsi heimilisins. Íbúar og starfsmenn borða í matsal heimilis og eftir atvikum á sinni deild. Þar er leitast við að framreiða fjölbreyttan, hollan og staðgóðan íslenskan mat. Jafnframt er sendur út heitur matur í hádeginu fyrir eldri borgara á starfssvæði heimilisins. Beiðni um heimsendingarþjónustu þarf að berast til fjölskyldusviðs Akraneskaupstaðar í síma 433 1000.

Matmálstímar:

 Morgunverður              kl. 08:30 til 10:00

Hádegisverður              kl. 12:00 til 13:00

Eftirmiðdagskaffi           kl. 14:45 til 15:30

Kvöldverður                 kl. 18:00 til 19:00

Kvöldkaffi                    eftir kl. 20:00.

Þvottahús

Á Höfða er starfrækt þvottahús þar sem þvegið er allt lín heimilisins ásamt fatnaði íbúa og starfsmanna. Nauðsynlegt er að allur fatnaður sé merktur með þar til gerðum merkimiðum sem forstöðukona afhendir. Æskilegt er að fötin séu auðveld í þvotti, þar sem ekki er tekin ábyrgð á þeim í þvottahúsi.

Hárgreiðsla

Á Höfða er starfrækt hárgreiðslustofa sem er opin þriðjudaga til föstudaga frá kl. 8:00 til 16:00. Panta þarf tíma hjá hárgreiðslumeistara, sími 433-4305.

Fótsnyrting

Á Höfða er starfrækt fótsnyrtistofa sem er opin alla virka daga. Panta þarf tíma hjá fótsnyrtifræðingi, sími 433- 4306.

Ferðaþjónusta

Ferðaþjónusta fyrir fatlaða á Akranesi er rekin frá Höfða. Upplýsingar og umsóknir eru hjá Fjölskyldusviði Akraneskaupstaðar, sími 433-1000.

Prestur

Sr. Eðvarð Ingólfsson annast helgistundir og guðsþjónustur á Höfða. Sr. Eðvarð er með viðtalstíma í Safnaðarheimilinu þriðjudaga til föstudaga kl. 11:30 – 12:30, sími 433-1502.

Heimsóknir

Heimsóknartími er frjáls að því marki að það trufli ekki heimilisfólk eða starfsmenn hússins. Húsið er opið kl. 08:00 til 23:00. Eftir það er svarað í dyrasíma.

Sölubúð/banki/bókasafn

Sölubúð er opin mánudaga og fimmtudaga frá kl. 10:30 til 11:30. Landsbankinn þjónustar íbúa á miðvikudögum kl. 09:30 til 10:30. Bókasafn Akraness sendir reglulega bækur og hljóðsnældur til íbúa undir þjónustunni sinni bókin heim.

Tryggingar

Lágmarkstryggingar eru teknar vegna innbús heimilisfólks. Íbúar þurfa sjálfir að tryggja önnur verðmæti ef þeim finnst ástæða til.

Þagnarskylda

Samkvæmt lögum hvílir þagnarskylda á starfsfólki heimilisins.