Líf og fjör á Höfða – Vökudagar og árshátíðarstemning

Það hefur heldur betur verið líf og fjör á Höfða undanfarna daga!

Vökudagar hófust fimmtudaginn 22. október með skemmtilegri opnunarhátíð og í tilefni af árshátíð starfsfólks var einnig blásið til skreytingarkeppni sem vakti mikla lukku meðal íbúa og starfsfólks.

Vökudagar og samsýningin Tengsl

Opnunarhátíð Vökudaga hófst kl. 17 með fallegum söng Ástu Marýjar Stefánsdóttur og boðið var upp á léttar veitingar. Gestir áttu notalega stund saman og nutu þess að skoða fjölbreytt listaverk og handverk sem prýða Höfða í tilefni hátíðarinnar.

Í ár ber samsýningin yfirskriftina Tengsl, en þar má sjá fjölbreytta listsköpun eftir einstaklinga sem tengjast Höfða með einum eða öðrum hætti.

Í alrými á 1. hæð sýna:

Freyja Alexandersdóttir – Litrík listaverk og leirmunir.

Guðrún Bjarnadóttir – Vatnslitaverk af íslensku landslagi og dýrum, máluð á árunum 1950–1970.

Haukur Hannesson – Málverk.

Leikskólinn Akrasel – Fjölskyldan mín.

Sara Björk Hauksdóttir – Grafíkverk.

Í Höfðasal sýna:

Dagdvöl og iðjuþjálfun – Fjölbreytt og skapandi handverk.

Erling Andersen – Tréverk, bátar og þriggja metra brú!

Freyja Alexandersdóttir – Litrík listaverk og leirmunir.

Gerður Guðjónsdóttir – Steinaverk.

Sýningin endurspeglar vel þá sköpunargleði og fjölbreyttu hæfileika sem finna má meðal þeirra sem tengjast Höfða.

Skreytingarkeppni og diskófjör!

Það var ekki síður mikið um að vera í húsinu í tilefni af árshátíð starfsfólks Höfða. Efnt var til skreytingarkeppni þar sem starfsfólk og íbúar tóku virkan þátt í undirbúningi og lögðu sig fram við að heilla dómnefndina.

Sköpunargleðin fékk sannarlega að njóta sín og mikil eftirvænting ríkti þegar dómnefndin, skipuð Veru Líndal og Sturra bæjarstjóra, mætti til að skoða skreytingarnar.

Það var að lokum diskóþemað hjá Hólm sem hreppti fyrsta sætið! Þar hafði greinilega verið lagt mikið upp úr skemmtilegri stemningu og hugmyndaauðgi.

Keppnin vakti mikla gleði og sýndi enn og aftur hversu skemmtilegir hlutir geta gerst þegar íbúar og starfsfólk taka höndum saman.

Verið hjartanlega velkomin á Höfða!

Vökudagar standa yfir til 1. nóvember og við hvetjum alla til að kíkja við á Höfða og skoða glæsileg listaverk og handverk sem eru til sýnis víðs vegar um húsið.

Það er sannarlega margt fallegt að sjá og við hlökkum til að taka á móti gestum!

Allir eru hjartanlega velkomnir!